लैङ्गिक हिंसा विरुद्धको १६ दिने अभियान बुधबार सम्पन्न भएको छ । “प्रविधिको सही प्रयोग गरौं, लैङ्गिक हिंसा अन्त्य गरौं” भन्ने मूल नारा सहित एकीकृत विकास कार्यालय स्याङ्जाले अभियानको अन्तिम दिन जिल्ला स्तरीय महिला पञ्चेबाजा प्रतियोगिता सञ्चालन गरेको हो ।
प्रतियोगितामा भीरकोट नगरपालिकाको एकुवार मगर पञ्चेबाजा समूह प्रथम, फेदीखोला गाउँपालिकाको राम्चेदेवी उद्यमशील महिला समूह द्वितीय र पुतलीबजार नगरपालिकाको मातृभूमि आमा समूह तृतीय बनेका छन् । कालिगण्डकी गाउँपालिकाको विर्घा महिला पञ्चेबाजा समूहलाई सान्त्वना पुरस्कार प्रदान गरिएको थियो । उनीहरूलाई क्रमशः १२ हजार, ८ हजार, ६ हजार र ४ हजार रुपैयाँसहित प्रमाणपत्र प्रदान गरिएको एकीकृत विकास कार्यालय स्याङ्जाका प्रमुख जीवन पौडेलले बताए ।
उत्कृष्ट सनाई र ढोलक वादन गर्ने महिलालाई पनि सम्मान गरिएको कार्यक्रममा सहभागीहरूले पञ्चेबाजासँगै महिलाले भोग्ने हिंसाका कथन र अधिकारका माग गीतमार्फत प्रस्तुत गरेका थिए ।
कार्यक्रममा भीरकोट नगरपालिकाका नगरप्रमुख गोविन्द कुमार कर्माचार्यले महिलाहरू संस्कृति मात्र होइन, हरेक क्षेत्रमा सक्षम भएको प्रमाण प्रतियोगितामा देखाएको प्रस्तुतिले दिएको बताए । उपप्रमुख भगवती रेग्मी अर्यालले पञ्चेबाजा जस्ता मौलिक संस्कृतिको संरक्षणले सीप विकास र आत्मविश्वास बढाउने बताइन् । निवर्तमान मेयर छायाराम खनालले कुनै पनि किसिमका हिंसा सहन नहुने र प्रतिरोध गर्नुपर्नेमा जोड दिए ।
एकीकृत सेवा कार्यालय प्रमुख जीवन पौडेलले पञ्चेबाजाको सीपले आयआर्जनमा टेवा पुग्ने र परम्परागत सीप बोकेका समुदायको पेशालाई सम्मान प्रदान हुने विश्वास व्यक्त गरे ।
स्याङ्जा प्रहरीले कार्यक्रममा साइबर सुरक्षासम्बन्धी प्रशिक्षण पनि दिएको थियो । कार्यक्रममा जिल्ला प्रहरी कार्यालय स्याङ्जाका प्रहरी निरीक्षक सागर कार्कीले प्रविधिको दुरुपयोगका कारण महिला साइबर क्राइमको सिकार बन्ने गरेको बताउँदै सामाजिक सञ्जालमा नैतिकता र मर्यादा पालन सबैको जिम्मेवारी भएको बताए । उनले अनावश्यक टिप्पणी, अश्लील फोटो–भिडियो प्रसारण जस्ता कार्यले हिंसा बढाउने उल्लेख गर्दै डिजिटल सुरक्षा प्रति सचेत रहन आग्रह गरे ।
राष्ट्रिय लोक तथा दोहोरी क्षेत्रमा सक्रिय कलाकारहरूको निर्णायक टोलीले प्रस्तुतीको मूल्याङ्कन गरेको कार्यक्रममध्ये गायक लोकनाथ सापकोटाले आकर्षक प्रस्तुति दिएका थिए ।
सहभागी महिलाहरूले सांस्कृतिक सीप प्रदर्शनसँगै अब हिंसा विरुद्ध मुख खोल्ने आत्मविश्वास बढेको प्रतिक्रिया दिए । महिला अधिकारका मुद्दा गीत–संगीतमार्फत उठान गर्न भीरकोट नगरपालिकाको समन्वयमा भीरकोट खेलमैदानमा कार्यक्रम आयोजना गरिएको थियो । स्थानीय आमा समूह, विद्यार्थी तथा जनप्रतिनिधिलगायत करिब दुई हजारभन्दा बढीको उपस्थिति रहेको कार्यक्रम सञ्चारकर्मी विक्रम परियारले सञ्चालन गरेका थिए ।
