मुक्तिनाथ विकास बैंकले सामाजिक उत्तरदायित्व कार्यक्रमअन्तर्गत जिल्ला प्रहरी कार्यालय स्याङ्जालाई ५० इञ्चको रंगिन टेलिभिजन प्रदान गरेको छ ।
टेलिभिजन हस्तान्तरण गर्दै बैंकका सञ्चालक भरतप्रसाद लम्सालले प्रहरी कार्यालयको आवश्यकता र मागअनुसार सहयोग गरिएको बताए । उनले बोर्डको निर्णयअनुसार यो सहयोग गरिएको उल्लेख गर्दै आगामी दिनमा पनि सहकार्य निरन्तर रहने बताए ।
कार्यालयमा आउने सेवाग्राहीले प्रतिक्षालयमै बसेर सूचनामूलक श्रव्य दृश्य सामग्री हेर्न र सुन्न सक्ने भएकाले यो उपकरण उपयोगी हुने लम्सालले बताए ।
स्याङ्जा प्रहरी प्रमुख प्रहरी उपरीक्षक दधिराम न्यौपानेले बैंकले मागअनुसार सहयोग उपलब्ध गराएर प्रहरी प्रशासनलाई सघाएको भन्दै आभार व्यक्त गरे । कार्यक्रममा बैंकका उपक्षेत्रीय निर्देशक ऋषिराम ढकाल, प्रहरी निरीक्षक सागर कार्की लगायतले पनि सहयोगको महत्वबारे बोलेका थिए ।
१९ वर्षअघि पुतलीबजारबाट सुरुवात गरेको मुक्तिनाथ विकास बैंक अहिले वाणिज्य बैंकको रूपमा अघि बढ्ने लक्ष्यसहित सेवा विस्तार गरिरहेको छ ।
