स्याङ्जाको मध्यभागमा रहेको वालिङ बजारमा आगामी माघ १४ देखि २५ गतेसम्म ‘नवौँ वालिङ महोत्सव’ हुने भएको छ । ‘हाम्रो गौरव हाम्रो शान, वालिङ महोत्सव हाम्रो पहिचान’ नारासहित प्रदेशस्तरीय कृषि, पर्यटन, संस्कृति र औद्योगिक व्यापार मेला तथा वालिङ् महोत्सवको आयोजना गरिएको हो ।
वालिङ उद्योग वाणिज्य संघको आयोजनामा हुने महोत्सवमा व्यापारिक मेला, विद्यालयस्तरीय नृत्य, लोकदोहोरी, सुन्तला तथा ताजा तरकारी प्रदर्शनी महोत्सवका मुख्य आकर्षण रहने संघका अध्यक्ष चेतनारायण श्रेष्ठले बताए । स्थानीय उत्पादनलाई प्राथमिकता दिएर महोत्सव सञ्चालन गर्न लागिएको अध्यक्ष श्रेष्ठको भनाइ छ ।
महोत्सवमा अर्गानिक कफी, पशुपंक्षीका उन्नत जात तथा प्रविधि, अदुवा–जडीबुटी, सूचना प्रविधि, शैक्षिक प्रदर्शनी, हस्तकला, खेलकुद प्रतियोगिता र बाल उद्यानसमेत समावेश हुने संघले जनाएको छ ।
गण्डकीमा लेखनाथ महोत्सवपछिको सफल उदाहरणका रूपमा चिनिँदै आएको वालिङ महोत्सवलाई विगतका संस्करणभन्दा फरक र अझ आकर्षक बनाउने तयारी भइरहेको संघका अध्यक्ष चेतनारायण श्रेष्ठले बताए । “यो महोत्सव वालिङबासी मात्र होइन, सारा जिल्लाको पहिचान हो,” उनले भने, “अगाडि बढेको कृषि, संस्कृतिको संरक्षण र पर्यटन प्रवर्द्धनमा यसले ठूलो भूमिका खेलेको छ ।”
यसपटकको महोत्सवमा १० करोड रुपैयाँ बराबरको कारोबार र तीन लाख दर्शक भित्र्याउने लक्ष्य लिइएको आयोजकले जनाएको छ । महोत्सवबाट एक करोड ७६ लाख आम्दानी र एक करोड दुई लाख खर्चपछि झण्डै ७३ लाख बचत गर्ने लक्ष्य आयोजक संघले राखेको छ ।
हरेक दुई–दुई वर्षमा मनाइँदै आएको यो ऐतिहासिक महोत्सवले आर्थिक र सांस्कृतिक उन्नतिसँगै वालिङलाई एक सुन्दर र सक्रिय शहरका रूपमा चिनाउन निरन्तर टेवा दिँदै आएको छ । नवौं संस्करणसम्म आइपुग्दा महोत्सवलाई सफल बनाउन स्थानीयदेखि जिल्लाबासीकै साथ रहेको छ ।
