स्याङ्जा प्रहरीले पछिल्ला ६ महिनामा १२८ जना फरार प्रतिवादीलाई पक्राउ गरेको छ । उनीहरूबाट दुई करोड २४ लाख तीन हजार ८९२ रुपैयाँ जरिवाना असुल भएको प्रहरीले जनाएको छ ।
पक्राउ परेकाले एक सय १० वर्ष नौ महिना नौ दिनको कैद सजाय भोग्नुपर्ने जिल्ला प्रहरी कार्यालय स्याङ्जाका प्रमुख तथा प्रहरी उपरीक्षक दधिराम न्यौपानेले जानकारी दिए । पक्राउ पर्नेमा ९६ पुरुष र ३२ महिला रहेका छन् ।
न्यौपानेका अनुसार अदालतबाट चार सय ८५ जनाको नाम फरार सूचीमा आएकोमा २६ प्रतिशतमा सफलता मिलेको हो । “फरारको खोजीलाई प्राथमिकतामा राखेर काम गरिरहेका छौं,” न्यौपानेले भने ।
प्रहरीले पत्रकार सम्मेलनमार्फत ६ महिनाको प्रगति सार्वजनिक गर्दै २०८२ जेठदेखि कार्तिकसम्म मुद्दा दर्ता र फर्स्यौटमा गति आएको बताएको छ । यो अवधिमा १३३ मुद्दा दर्ता हुँदा ५५ मुद्दा फर्स्यौट भएका छन् । बाँकी ७८ मुद्दा कार्यान्वयनका चरणमा छन् । चालू आर्थिक वर्षको चार महिनामा मात्रै ७१ मुद्दा दर्ता भएको छ ।
प्रहरीले करिब आधा शताब्दीअघि फरार भएका दुई प्रतिवादीसमेत नियन्त्रणमा ल्याएको छ । विसं. २०३५ सालमा सुन र रेडियो चोरी मुद्दामा फरार रहेका लालबहादुर राना मगर र गिरीप्रसाद गुरुङ ४७ वर्षपछि पक्राउ परेका हुन् । उनीहरूलाई तत्कालीन अदालतले चार हजार पाँच सय रुपैयाँ जरिवाना र डेढ महिना कैद सजाय तोकेको थियो । प्रहरीले फरार नियन्त्रणलाई निरन्तर जारी राख्ने जनाएको छ ।
