स्याङ्जाको वालिङ नगरपालिका –५ जरकोटमा भएको कुटपिट प्रकरणमा ज्यान गुमाएका ढालबहादुर थापाको मृत्युपछि गाउँ अझै शोकमा डुबिरहेको छ । साधारण विवादले मृत्युमा पुग्दा स्थानीय स्तब्ध भएका छन् भने प्रहरी पक्षले अनुसन्धानलाई तीव्र बनाएको जनाएको छ ।
भदौ ७ गते राति मोटरसाइकल चर्को आवाजमा चलाएको विषयमा सुरु भएको विवादपछि वालिङ् -५ बाहुनडाँडाका ३२ वर्षीय ढालबहादुर थापालाई केहि युवाहरूले कुटपिट गरेका थिए । गम्भीर घाइते भएका उनलाई तत्कालै उपचारका लागि पोखरास्थित गण्डकी मेडिकल कलेज लगिएकोमा भोलिपल्ट भदौ ८ गते बिहान चिकित्सकले मृत घोषणा गरेका थिए ।
घटनापछि प्रहरीले आठ जना आरोपितलाई पक्राउ गरेको छ । पक्राउ पर्नेमा स्याङ्जाको हरिनास गाउँपालिका -५ का २२ वर्षीय सिजन थापा, २० वर्षीय विवेक मानन्धर, २३ वर्षीय गुरु प्रसाद लम्साल ‘गोरे’, १७ वर्षीय आर्यन क्षेत्री, २३ वर्षीय विश्वास वाग्ले, हरिनास गाउँपालिका -६ का २२ वर्षीय निशान थापा र चापाकोट नगरपालिका -५ का २४ वर्षीय अनिल शाही ठकुरी र २३ वर्षीय बादल विक रहेका छन् । घटनामा संलग्न रहेको आरोपमा प्रहरीले हरिनास गाउँपालिका –५ का २२ वर्षीय सिजन थापा र चापाकोट नगरपालिका –५ कान्तीका २४ वर्षीय अनिल शाहीलाई भदौ ८ गते नै नियन्त्रणमा लिएको थियो ।
पक्राउ परेका आरोपितहरुलाई कर्तव्य ज्यान मुद्दामा १० दिनको म्याद थप गरी अनुसन्धान अघि बढाएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए ।
अनुसन्धानसँगै प्रहरीले घटनास्थल वरपरका थप प्रमाण सङ्कलन, प्रत्यक्षदर्शी बयान र मोबाइलजस्ता डिजिटल सामग्रीको परीक्षणमा समेत जोड दिएको सूचना अधिकारी चौधरीको भनाइ छ ।
ढालबहादुरको असामयिक निधनले परिवारमा अपूरणीय क्षति पुर्याएको छ । स्थानीयले उनीलाई मिलनसार र सहयोगी स्वभावको व्यक्ति भएको भन्दै स्मरण गरेका छन् । “साधारण विवादमा पनि आत्मसंयम गुमाउँदा कस्तो ठूलो दुर्घटना हुन्छ भन्ने पाठ हामीले सिकेका छौं,” एक स्थानीयले भने ।
यसबीच, मृतकका परिवारले दोषीलाई कडाभन्दा कडा कानुनी कारबाही गर्न माग गरेका छन् ।
