स्याङ्जाको पुतलीबजार नगरपालिका–४ बेलघारीस्थित परालको टौवामा लागेको आगलागी घटनामा संलग्न रहेको आरोपमा एक जनालाई प्रहरीले पक्राउ गरेको छ । पक्राउ पर्नेमा अर्जुनचौपारी गाउँपालिका–१ का ३३ वर्षीय नविन न्यौपाने रहेका छन् ।
घटनाको अनुसन्धानका क्रममा आगो जानाजानी लगाइएको निष्कर्षसहित न्यौपानेलाई पक्राउ गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक (डिएसपी) प्रसन्न राज चौधरीले जानकारी दिए ।
सोमबार बिहान परालको टौवामा आगलागी भएको सूचना पाएपछि जिल्ला प्रहरी कार्यालय स्याङ्जाबाट खटिएको टोलीले करिब एक घण्टापछि आगो नियन्त्रणमा लिएको थियो ।
प्रहरीले पक्राउ परेका न्यौपानेविरुद्ध आपराधिक उपद्रव सम्बन्धी मुद्दा दर्ता गरी बुधबार स्याङ्जा जिल्ला अदालतबाट सात दिनको म्याद थप अनुमति लिएर आवश्यक अनुसन्धान अघि बढाएको जनाएको छ ।
