स्याङ्जामा अब सवारी भाडा मनलाग्दी रूपमा बढाउन नपाइने भएको छ । जिल्ला प्रशासन कार्यालय स्याङ्जाले सहायक मार्गहरूमा चल्ने बस, जिप, टेम्पो, अटो र ई–रिक्साका लागि नयाँ भाडादर तोकेर तत्कालै लागू गर्ने निर्णय गरेको छ ।
प्रशासनले पक्की सडकमा बसको प्रतिव्यक्ति प्रतिकिलोमिटर भाडा ५ रुपैयाँ ५० पैसा, र जिपको ६ रुपैयाँ कायम गरेको छ । कच्ची सडकमा भने बसले प्रतिकिलोमिटर ११, र जिपले १२ रुपैयाँसम्म लिन सक्नेछन् ।
टेम्पो, अटो र ई–रिक्साका लागि भने पक्की सडकमा ३ किलोमिटरभित्र यात्रु प्रतिकिलोमिटर ३०, र ३ किलोमिटरभन्दा बढी दूरीमा १० रुपैयाँका दरले थप भाडा लिने व्यवस्था गरिएको छ । कच्ची सडकमा भने ३ किलोमिटरसम्म ४० र सोभन्दा बढी दुरीमा १५ रुपैयाँका दरले थप्ने निर्णय गरिएको छ ।
साथै, सबै यातायात व्यवसायीले नयाँ भाडादर स्पष्ट देखिने गरी सवारीसाधन र टिकट काउन्टरमा टाँस्नुपर्नेछ । भाडादर लुकाउने, फरक दरमा भाडा असुल्ने वा यात्रु ठग्ने सवारीसाधनमाथि ट्राफिक प्रहरीले नियमित अनुगमन गर्ने जनाएको छ ।
हाल कच्ची बाटो पक्की भएर पनि पुरानै दरमा भाडा असुल्ने गुनासो बढेपछि प्रशासनले अब यस्तो कार्य रोक्ने चेतावनी दिएको छ । पक्की सडकमा कच्ची सडक बराबरको भाडा उठाउनेलाई प्रहरीमार्फत कारबाही गरिने प्रशासनले जनाएको छ ।
जेष्ठ नागरिक, विद्यार्थी र अपाङ्गता भएका व्यक्तिलाई तोकिएको छुट अनिवार्य रूपमा लागू गर्नुपर्ने र यातायातमा छुटका सिट सुनिश्चित गर्नुपर्ने निर्णय पनि प्रशासनले गरेको छ । निजी प्रयोजनका रातो प्लेटका सवारी साधनले यात्रु ओसारपसार गरेमा कानुनी कारबाही हुने चेतावनी पनि दिइएको छ ।
यसैगरी, पूर्वाधार विकास कार्यालय, यातायात शाखा स्याङ्जा र स्थानीय पालिकाको समन्वयमा टेम्पो दर्ता शुल्क निर्धारण गर्ने निर्णय गरिएको छ ।
बैठकमा प्रमुख जिल्ला अधिकारी ईश्वरीप्रसाद अर्यालले यातायात क्षेत्र पारदर्शी, यात्रुमैत्री र जिम्मेवार बनाउन सबै सरोकारवालाको सहकार्य आवश्यक रहेको बताए ।
