जिल्ला प्रहरी कार्यालय र जिल्ला ट्राफिक प्रहरी कार्यालय स्याङ्जाको आयोजनामा ट्राफिक सप्ताह -२०८२ आइतबारदेखी सुरु भएको छ । सडक अनुशासन तथा सवारी दुर्घटना न्यूनीकरणका लागि जनसचेतना जगाउने उद्देश्यका साथ ट्राफिक सप्ताह सुरु भएको हो ।
ट्राफिक सप्ताहको अवसरमा आइतबार बिहान बाजागाजासहित स्याङ्जा सदरमुकाममा प्रभातफेरी गरिएको थियो । पुतलीबजार नगरपालिका -१ प्रगतिनगरदेखी सुरु भएको प्रभातफेरी विभिन्न चोकहरु हुँदै सिटीहलसम्म र्याली निकाली औपचारिक कार्यक्रममा परिणत गरिएको थियो ।
स्याङ्जाको सदरमुकामस्थित सिटीहलमा परिणत ट्राफिक सप्ताहको औपचारिक कार्यक्रममा स्याङ्जा प्रमुख जिल्ला अधिकारी, स्याङ्जा प्रहरी प्रमुख, नेपाली सेना, सशस्त्र प्रहरी, सरकारी कर्मचारी, विभिन्न पालिकाका प्रमुख/उपप्रमुख, शिक्षक, विद्यार्थी, सर्वसाधारण, यातायात व्यवसायी, सवारी चालकलगायतका विभिन्न संघसंस्थाका प्रतिनिधिहरुसहित करिब ६०० जनाको उपस्थितिमा पुतलीबजार नगरपालिकाका प्रमुख तुलसीराम रेग्मीले पानसमा दीप प्रज्ज्वलन गरेर उद्घाटन गरेका थिए ।
उक्त ट्राफिक सप्ताहको सुभारम्भ गर्दै रेग्मीले सानो गल्ती र लापरबाहीले ठूलो जोखिम र क्षति निम्त्याउने भन्दै सरोकारवाला सम्पूर्णलाई ट्राफिक नियमको पालना गर्नुपर्ने कुरामा जोड दिए ।
उनले ट्राफिक नियमको पालना गरेर सभ्य नागरिकको परिचय दिन आग्रह गर्दै सरोकारवाला सबैले सामुहिक प्रयास गरे सडक दुर्घटना न्यूनीकरण हुने बताए ।
सप्ताह व्यापी ट्राफिक सचेतना अभियानको सुभारम्भ कार्यक्रममा आँधीखोला गाउँपालिकाका अध्यक्ष विश्वनाथ पौडेल, निमित्त प्रमुख जिल्ला अधिकारी दीपक पौडेल, स्याङ्जा प्रहरी प्रमुख प्रहरी उपरीक्षक दधिराम न्यौपाने, स्याङ्जा – गण्डकी बस यातायात प्रालिका प्रबन्ध निर्देशक महेश बहादुर थापा ‘गणेश’लगायतका वक्ताले सवारी चालक, सवारी यात्रु, पैदल यात्रुहरुले अनुशासन कायम गरे सवारी दुर्घटना न्यूनीकरणमा सहयोग पुग्ने बताए ।
ट्राफिक सप्ताहलाई सफल पार्न ट्राफिक प्रहरीलाई आवश्यकता अनुसार जनशक्ति उपलब्ध गराउनुपर्ने, आधुनिक प्रविधिका प्रयाप्त उपकरणसहित प्रविधिमैत्री सेवाका लागि आवश्यक सामाग्री उपलब्ध गराउनुपर्नेमा वक्ताहरुले जोड दिए ।
जिल्ला प्रहरी कार्यालय स्याङ्जाका प्रमुख प्रहरी उपरीक्षक दधिराम न्यौपानेले प्रदेशभर एकैसाथ सुरु भएको ट्राफिक सप्ताह सवारी दुर्घटना न्यूनीकरण र ट्राफिक नियमको बारेमा व्यापक जनचेतना जगाउने गरी स्याङ्जाका ११ वटै पालिकामा पुगेर विभिन्न सचेतनामूलकलगायतका कार्यक्रम गरि मनाइने बताए ।
यस्तै, जिल्ला ट्राफिक प्रहरी कार्यालय स्याङ्जाका प्रमुख प्रहरी नायब निरीक्षक भुपेन्द्र प्रसाद गौलीले ट्राफिक सप्ताहमार्फत दुर्घटना न्यूनीकरण र ट्राफिक नियम पालनालाई प्रभावकारी बनाइने बताए । सप्ताहलाई यात्रु, चालक र प्रहरीबीचको सम्बन्धलाई नजिक बनाउने, सडक यात्रालाई सुरक्षित बनाउने र दुर्घटना न्यूनीकरणमा केन्द्रित गरिएको कार्यालय प्रमुख गौलीको भनाइ छ ।
उनले सप्ताहमा लामो/छोटो दुरीका यात्रुवाहक बसहरुमा सचेतनामूलक स्टिकर टाँस गर्ने, जनचेतनामूलक पर्चा/पम्पलेट वितरण गर्ने, चोकचोकमा स्वयंसेवक परिचालन गरी सडक प्रयोगकर्तालाई बाटो काट्न सिकाउनेलगायतका कार्यक्रम हुने बताए ।
बजार क्षेत्रमा पार्किङ व्यवस्थापनमा सहजीकरण गर्ने, ग्रामीण सडक लक्षित प्रशिक्षण, सवारीसाधनको भाडा अनुगमन गर्ने, यात्रु आरक्षण सिटको कार्यान्वयनबारे अनुगमन गर्ने, सडक प्रयोग सम्बन्धी चालक, यात्रु, सर्वसाधारण र सरोकारवालालाई प्रशिक्षण, रक्तदानलगायतका कार्यक्रम ट्राफिक सप्ताहमा तय गरिएको जिल्ला ट्राफिक प्रहरी कार्यालय स्याङ्जाले जनाएको छ ।
