पोखरा । गण्डकी प्रदेश अन्तर्गतका १५ नयाँ हिमाल आरोहणका लागि खुला गरिएको छ ।
सरकारको निर्णयपछि मुस्ताङ र गोरखाका पिकहरू अब आरोहीले चढ्न पाउने छन् । खुला भएका नयाँ हिमालमा सबैभन्दा बढी मुस्ताङका छन् ।
मुस्ताङको लो घेकर दामोदर कुण्ड गाउँपालिका १ मा पर्ने ६ हजार ६२ मिटरको ज्याङलाटुन्पु पिक,६ हजार १८७ मिटर उचाइको केक्याप रि–१ र ६ हजार ११ मिटर उचाइको केक्याप रि–२ छन् ।
यस्तै, लोमन्थाङ गाउँपालिका ४ मा पर्ने ६ हजार ३६६ मिटरको छुआमा पिक, ६ हजार ३२५ मिटरको छुआमा २, ६ हजार २६८ मिटर उचाइको छुआमा पिक ३ तथा लोमन्थाङ ५ मा रहेको ६ हजार २२९ मिटर उचाइको चुङ्गेन चाङ्गमा, ६ हजार २९ मिटरको घ्युन हिमाल २, ६ हजार २७ मिटरको घ्युन हिमाल ३ पनि खुला भएको छ ।
सोही ठाउँको ६ हजार १८६ मिटर अग्लो मनसयल पूर्व र ६ हजार १६० मिटर अग्लो मुस्ताङ हिमाल पनि अब आरोहीका लागि खुलेको छ ।
लोमन्थाङ १ मा पर्ने दामोदर हिमाल शृङ्खलाको ५ हजार ८०७ मिटर अग्लो लुनाधार खाङ्ग, ५ हजार ८९७ मिटर अग्लो यारसाङ्ग खाङ्ग तथा गोरखाको गणेश हिमाल श्रृंखलामा पर्ने चुमनुब्री गाउँपालिका ३ र धार्चे १ को ६ हजार २५० मिटर उचाइको लुम्बो हिमाल पनि खुला भएको छ ।
डोल्पा र मुस्ताङको सीमानामा पर्ने धौलागिरी हिमाल शृङ्खलाको ६ हजार ३३८ मिटर अग्लो होङदे पश्चिमलाई समेत आरोहणका लागि सूचीकृत गरी राजपत्रमा प्रकाशन गरिएको हो ।
