स्याङ्जाको वालिङ् नगरपालिकाबाट जुवातास खेलिरहेको अवस्थामा सातजना पक्राउ परेका छन् । शनिबार बेलुका वालिङ् – ६ मिर्दीबाट उनीहरूलाई पक्राउ गरिएको हो ।
पक्राउ पर्नेमा वालिङ् – ६ का ६८ वर्षीय तेज बहादुर थापा, सोही ठाउँका ६७ वर्षीय खुम बहादुर गुरुङ, ३७ वर्षीय मान बहादुर पौडेल, ३० वर्षीय मुनिष थापा, ४५ वर्षीय नर बहादुर गुरुङ, वालिङ् – ५ का ३२ वर्षीय शिशिर राना मगर र वालिङ् – ७ का २७ वर्षीय मौसम क्षेत्री रहेका छन् ।
उनीहरुको साथबाट ४५ हजार एक सय ३५ रुपैयाँ र दुई सय १३ पत्ती तास बरामद भएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक हरिप्रसाद पौडेलले जानकारी दिए ।
स्थानीय तेज बहादुर थापाको घरमा उनीहरूले तास खेलेका थिए । पक्राउ परेका सबैलाई सात दिनको म्याद थप गरी अनुसन्धानको प्रक्रिया अगाडि बढाइएको प्रवक्ता पौडेलले बताए ।
