नेपालमै पहिलोपटक स्याङ्जाको अर्जुनचौपारीमा बनेको नवग्रह मन्दिरको दर्शन गरी मन्दिरको प्राण प्रतिष्ठा तथा अनुष्ठान एवं धार्मिक महोत्सवमा शनिबार डा. स्वामी केशवानन्द गिरीले प्रवचन दिएका छन् ।
फागुन ६ देखि सुरु भएर १४ गतेसम्म चल्ने महोत्सव अवधिभर आचार्य श्री चैतन्य कृष्ण गुरु प्रमुख वाचक रहेका छन् ।
शनिबार उक्त महोत्सवमा प्रवचन दिँदै डा. केएन स्वामीले संस्कार, संस्कृति तथा नैतिक शिक्षा समेत आवश्यक रहेको बताएका थिए । मन्दिरमा पुजाआजा तथा दर्शन गरेपछि डा. स्वामीले दुई घण्टा प्रवचन दिएका थिए ।
डा.स्वामी केशवानन्दद्वारा लिखित संस्कार शिक्षा देशभरमै पालिकास्तरमा पहिलोपटक अर्जुनचौपारीमा पठनपाठन भएको छ । आफ्ना मौलिक कला, संस्कृति, चाल चलनको संरक्षण, सम्बर्द्धन र पछिल्लो पुस्तालाई संस्कारयुक्त बनाउनला लागि पालिकामा संस्कार शिक्षा सुरु गरिएको गाउँपालिका अध्यक्ष प्रकाश तिवारीले जानकारी दिए ।
स्थानीय पाठ्यक्रमअन्तर्गत संस्कार शिक्षा उपयुक्त लागेकाले गत आर्थिक वर्षको शैक्षिक सत्रको शुरुआतदेखि कक्षा ६, ७ र ८ मा पठनपाठन थालिएको अध्यक्ष तिवारीले बताए ।
पाठ्यपुस्तकमा नैतिक ज्ञानगुनका विषयहरुलाई कथा, कविताका माध्यमबाट प्रस्तुत गरिएको छ । हाल पठनपाठनमा रहेको संस्कार शिक्षाको भाग १, २ र ३ प्रकाशन गरी कक्षा ६, ७ र ८ मा लागू गर्ने उनले जानकारी दिए ।
संस्कार शिक्षाले हाम्रो रीतिरिवाज, परम्परा, चालचलन, संस्कार संस्कृतिका बारेमा पछिल्लो पुस्तालाई ज्ञान दिने भएकाले पनि संस्कार संस्कृतिको रक्षाका लागि समय सान्दर्भिक रहेको अध्यक्ष तिवारीको भनाइ छ । गाउँपालिकाले उक्त पाठ्यपुस्तक विद्यार्थीलाई निःशुल्क उपलब्ध गराएको छ ।
