अर्जुनचौपारीमा बनेको नेपालकै पहिलो नवग्रह मन्दिरको अनुष्ठान, गिता ज्ञान तथा धार्मिक महोत्सवमा भक्तजनको घुइँचो लागेको छ । यहाँ दिनहुँ हजारौंको संख्यामा दर्शन एवं पुजाआजा गर्ने भक्तजनहरु आउने गरेका छन् ।
अर्जुनचौपारी गाउँपालिका – १ जलबराह धार्मिक वनमा निर्माण भएको नवग्रह मन्दिरमा अनुष्ठानको पाँचौ दिनमा करिब २५ हजार जना भक्तजनहरु आएको गाउँपालिका अध्यक्ष प्रकाश तिवारीले जानकारी दिए ।
अनुष्ठान सुरु भएसङ्गै दिनहुँ भक्तजनको घुइँचो लागेपनि शनिबार पुजा गरिने नवग्रह मन्दिर भएकाले पनि शनिबार धेरैको संख्यामा भक्तजनको उपस्थिति रहेको अध्यक्ष तिवारीको भनाइ छ । मन्दिरमा पुजाआजा तथा दर्शनको लागि बिहानैदेखि सुरु गरेपनि नौ बजेबाट नै लाइनमा बसेर भक्तजनले पुजाआजा गरेर फर्केका छन् ।
१४४ वर्षमा आएको महाकुम्भको समय अत्यन्त शक्तिशाली र पवित्र हुने हुँदा महाशिवरात्रीको अवसर पारेर यहाँ नवग्रह मन्दिरको प्राण प्रतिष्ठा तथा अनुष्ठाण र धार्मिक महोत्सव गरिएको हो ।
यहि १४ गतेसम्म चल्ने अनुष्ठान तथा धार्मिक महोत्सवमा विजया एकादशीको अवसरमा सोमबार १ करोड २५ लाख दीप प्रज्वलन गरिने छ । यस महोत्सवमा चार वेदको पाठ पारायण, गायत्री मन्त्रद्वारा सवालाख हवन, धार्मिक अन्तरक्रिया, सन्ध्याकालिन महाआरती तथा भजनकृतन गरिँदै आइएको छ ।
यस महोत्सवमा आचार्य श्री चैतन्य कृष्ण महाराज गुरु प्रमुख वाचक रहेका छन् भने शनिबार केएन स्वामीले धार्मिक प्रवचन दिएका थिए । यहाँ आउने हरेक भक्तजनलाई रुद्राक्षको माला लगाउने व्यवस्था समेत गरिएको छ ।
घर तथा शक्तिपीठको एक नवग्रहको प्रतिमा राखेर पूजा गर्ने गरिएकोमा यहाँ नेपालकै पहिलोपटक नवग्रह मन्दिरको निर्माण गरिएपछि दर्शन तथा पूजाअर्चना गर्न पाइने भएको छ ।
१५७ रोपनी अर्थात् आठ हेक्टर क्षेत्रफलमा फैलिएको यस धार्मिक वनमा नवभुज आकारको २७ फिट अग्लो नवग्रह मन्दिर बनाइएको छ । यस मन्दिरमा रहने पिल्लरको सबैभन्दा माथि आकाशतर्फ फर्काएर सौर्यमण्डलीय ब्रह्माण्डको प्रतीक राखिएको छ ।
पिल्लरको १४ फिटमा सूर्य, शुक्र, केतु, चन्द्र, मंगल, बुध, शनि, बृहस्पति र राहुका प्रतीक राखिएको छ भने पिल्लरको नौवटा भुजामा ग्रह अनुसारका रंग लगाइएको छ । नवग्रह मन्दिरसङ्गै षट्कोण शिवालय बनाइएको छ भने यसको बीचमा पशुपतिनाथको जस्तै पञ्चमुखी शिवलिङ्ग (सात क्वीन्टल) र कोणमा गणेश, कुलदेवता, लक्ष्मी, कालभैरव, हनुमानको मूर्ति राखिएको छ ।
मन्दिरमा षट्कोणको एक छेउबाट प्रवेश गरेर गणेश, कुलदेवता (तेलको पोखरी), इष्टदेवताको पूजा गरेर बीचमा रहेको पञ्चमुखी शिवलिङ्गको दुई पटक घुमेर पूजा गरेसङ्गै हनुमान, लक्ष्मी, कालभैरवको पूजा गरेर बाहिर निस्किने बनाइएको छ ।
षट्कोण शिवालयको पूजा पश्चात् देब्रे छेउबाट हिँडेर करिब तीन सय मिटर टाढा रहेको वर्षौंदेखि पूजा अर्चना गरिँदै आइएको पञ्चकन्याको मन्दिरको दर्शन गरिनेछ । त्यस पश्चात् विपरीत बाटो दियो आकारको पूर्वतर्फ फर्केको नवग्रह मन्दिर पुगिने छ । नौ चक्रमा रहेको मन्दिरको एक ठाउँबाट छिरेर परिक्रमा सहितको पूजा गरेपछि चक्रको पुछारमा रहेको सुरुङबाट बाहिर निस्किने छ । षट्कोण, नवग्रह तथा यहाँ हिँड्ने बाटोमा स्थानीय ढुङ्गा बिच्छाएर कलात्मक बनाइएको छ भने दुबो बिच्छाएर हरिया र सुन्दर बनाइएको छ ।
यहाँ नव्रग्रह यन्त्र, शिवयन्त्र र एक मण्डला समेत निर्माण गरिएको छ भने मन्दिरमा विवाह नहुने हुँदा सँगै रहेको राधाकृष्ण मन्दिरको मर्मत समेत गरिएको छ । यहाँ षट्कोण शिवालयका मूर्तिको अस्तित्वमा रहेको कर्णको मूर्ति नवग्रह फर्काएर करिब तीन मिटर पूर्वको जङ्गलमा राखिएको छ ।
नवग्रह मन्दिर शनिबार मात्र खुला हुनेछ भने नौमध्ये एक चक्रमा भने हरेक दिनमा पनि पूजा गर्न सकिने छ । सौर्यमण्डलीय ब्रह्माण्डको मूर्ति भने हरेक वर्षको गणेश चतुर्थीमा मात्र हेर्न पाइने छ भने सो दिन पालिका नै बिदा गरेर पूजा गरिने छ ।
मूल नवग्रह मन्दिर पालिकाको वडा नं. – १ मा रहेपनि अन्य नौवटा निशान प्रतीमा पालिकाका अन्य पाँच वडा तथा भौगोलिक स्वरूप ब्रह्माण्डीय स्वरूपमा घुमेर रहेको भीरकोट नपाको वडा नं – ७, पुतलीबजार नपाको वडा नं – १३ र १४ र आँधीखोला गापा – १ मा निशान प्रतिमालाई आलोपालो पूजा गर्ने प्रबन्ध मिलाइने छ भने नौ वर्षमा सबै निशान पहिलाको ठाउँमा पुग्ने छन् ।
नव्रग्रह मन्दिर बनेको यस जल वराह धार्मिक वनभित्र ग्रह अनुसारका बिरुवा समेत रोपिएको छ ।
