स्याङ्जा अस्पतालमा जाँच गर्न पुगेका बिरामीलाई म्याद गुज्रिएका औषधि वितरण गर्ने गरिएको पाइएको छ । दुई दिन अगाडि मात्र चेकजाँचका लागि पुगेका एक बिरामीलाई यहाँको फार्मेसीबाट म्याद गुज्रिएको औषधि दिइएको हो ।
नाम नबताउने सर्तमा पुतलीबजार नगरपालिका – १ का एक बिरामीलाई उनले प्रयोग गर्ने फ्लूम्याक्स – १० नामक औषधि अस्पतालको फार्मेसीले एक महिना प्रयोगका लागि म्याद गुज्रिएको औषधि दिएको जानकारी दिए ।
यस बारेमा स्याङ्जा अस्पतालका मेडिकल सुपरिटेन्डेन्ट सुशील मरासिनीले सो औषधि भुलबस दिन पुगेको बताउँदै आगामी दिनहरुमा यस्ता गल्ती सुधार गर्ने बताए । मेसु मरासिनीले औषधि वितरण गर्ने बेलामा म्याद हेरी म्याद गुज्रिएका साथै म्याद गुज्रिन लागेकालाई भण्डारन गरेर राख्ने समेत प्रतिबद्धता जनाए ।
अस्पतालमा बिमाको कार्यक्रम सुरु भएसङ्गै बिरामीको चाप समेत बढेको अस्पताल प्रशासनले जनाएको छ । अस्पताल फार्मेसीबाट दैनिक जसो दुई सय जना बिरामीलाई औषधि वितरण हुँदै आएको छ ।
अस्पताललाई विश्वास गरेर चेकजाँच गरेर औषधि सेवन गर्दै आएका बिरामीहरुले पनि आफूले प्रयोग गर्ने औषधिहरुको म्याद हेरेर मात्र प्रयोग गर्नुपर्ने अवस्था सिर्जना भएको छ ।
