पोखरा । दसैंको मुखमा गण्डकीका मुख्यमन्त्री सुरेन्द्रराज पाण्डे भारत गएका छन् ।
उनी आइतबार अर्थात् असोज २० गते आफ्नो र पत्नीको उपचारका लागि पाण्डे गएको उनको सचिवालयले जनाएको छ । मुख्यमन्त्री पाण्डे साउन १३ गते पनि भारत गएका थिए । उनको घुँडामा समस्या छ ।
उपचारका लागि भारत पुगेका मुख्यमन्त्री पाण्डेले दसैं पनि उतै मनाउने भएका छन् । छोरा अध्ययनका लागि भारतमा रहेकाले मुख्यमन्त्रीले उतै दसैं मनाएर फर्किने छन् ।
आफ्नो अनुपस्थितिमा पाण्डेले कृषि भूमि व्यवस्था तथा सहकारी मन्त्री पद्मा जिसी श्रेष्ठलाई कार्यवाहक दिएका छन् । मुख्यमन्त्रीपछि पहिलो वरियतामा रहेकाले पाण्डेले पद्मालाई कार्यवाहक दिइएको हो । पद्मा गण्डकीमा एमालेको नेतृत्व गर्दै सरकारमा सहभागी भएकी हुन् । पद्मालाई कार्यवाहक दिएको बारे कांग्रसकै मन्त्री र सरकारका प्रवक्ताले समेत अनभिज्ञता जनाएका छन् ।
यसअघि मुख्यमन्त्री पाण्डे भारत जाँदा सामाजिक विकास तथा स्वास्थ्य मन्त्री बिन्दुकुमार थापालाई कार्यवाहक दिएका थिए ।
९ सदस्यीय मन्त्रिमण्डल रहने निर्णयसहित एमालेका ४ जना सरकारमा सहभागी छन् । दीपक मनाङेलाई च्यापेर बसेका मुख्यमन्त्री पाण्डेले मनाङको राजीनामापछि खाली भएको मन्त्रालयमा मन्त्री नियुक्त गर्न सकेका छैनन् । जसका कारण वातावरण तथा वन मन्त्रालयले ४ महिनादेखि मन्त्री पाउन सकेको छैन ।
त्यसो त मुख्यमन्त्री अनिर्णयको बन्दी हुँदा लामो समय प्रदेशका मन्त्रालयहरु ३ महिना खाली भए । एमालेसँगको लामो रस्काकस्सीपछि २ मन्त्रालय थपेर सरकारले पूर्णता पाएको थियो । तर मन्त्रालयमा चित्त नबुझेपछि दीपक मनाङे बाहिरिएका थिए ।
