पोखरा । गण्डकी प्रदेशको यहाँको अग्रणी अनलाइन गण्डकन्यूज डटकम तथा यस गण्डकी न्यूजका संस्थापक सम्पादक रञ्जन अधिकारी पोखरामा शनिबार सम्मानित भएका छन् । दोस्रो राष्ट्रिय संगीत अवार्ड समारोहमा पत्रकार अधिकारीलाई सम्मान गरिएको हो ।
गण्डकी प्रदेशका प्रदेश प्रमुख डिल्लीराज भट्टले पत्रकार अधिकारीलाई दोसल्ला ओढाई सम्मानपत्र प्रदान गरी सम्मान गरेका हुन् ।
कास्की खबर प्रालिले आयोजना गरेको अवार्ड समारोहमा अधिकारीलाई नेपाली संगीत क्षेत्रमा विशेष योगदान दिएकोमा सम्मान गरेको आयोजकले जनाएको छ ।
पत्रकार अधिकारी विगत १६ वर्षदेखि पोखरामा पत्रकारिता गर्दै आएका छन् । २०६५ सालमा रेडियो अन्नपूर्णबाट पत्रकारिता सुरु गरेका अधिकारी बिग एफएमका स्टेशन म्यानेजर भइसकेका छन् ।
गण्डकी प्रदेशकै अग्रणी न्यूज पोर्टल गण्डक न्यूज, गण्डकी न्यूजका संस्थापक सम्पादक अधिकारीले आदर्श समाज दैनिक, कास्की आवाज दैनिक, गोलनेपाल डटकम, एभिन्यूज टेलिभिजन लगायतका सञ्चारमाध्यममा काम गरिसकेका छन् ।
इतिहास, व्यवस्थापन र आमसञ्चारका विद्यार्थी अधिकारी अहिले गण्डकी प्रदेश प्रमुखको प्रेस संयोजक छन् । उनी खेलकुद पत्रकार मञ्च, गण्डकीका सल्लाहकार, अनलाइन पत्रकार संघ, गण्डकीका सल्लाहकार, प्रेस चौतारी कास्कीका सचिव हुन् ।
पोखराकै पहिलो पत्रकार जगन्नाथ सिग्देलको स्मृतिमा स्थापित जगन्नाथ सिग्देल स्मृति युवा पत्रकारिता पुरस्कार २०७४, यातायात पत्रकारिता पुरस्कार २०७३ लगायत अन्य संघसंस्थाबाट अधिकारी सम्मानित एवं पुरस्कृत भइसकेका छन् ।
उक्त अवसरमा सम्पादक अधिकारीसँगै पोखराका पत्रकार गौरव त्रिपाठी र काठमाण्डौका सञ्चारकर्मी कमल सरगमलाई पनि सम्मान गरिएको थियो । पत्रकारद्वयले डेढ दशक नेपाली पत्रकारितामा योगदान गरिसकेका छन् । यस्तै, सागर कार्की, साहिल गायक लगायत संगीतकर्मी पनि सम्मानित भए ।
अवार्डका विभिन्न २६ विधामा १ सय ३० जना संगीतकर्मी मनोनयनमा परेका थिए । हरेक विधाका ५ मनोनयनमध्ये सर्वोत्कृष्टलाई अवार्ड प्रदान गरिएको थियो । राष्ट्रिय संगीत अवार्डमा आधुनिक, राष्ट्रिय गीत, लोकदोहोरी गीत तथा भाषाभाषीका गीतलगायतका विधाहरु समावेश गरिएको थियो ।
प्रमुख अतिथि प्रदेश प्रमुख भट्टले मौलिक संस्कृति, संगीत र कला विश्वमाझ देशको प्रमुख पहिचान तथा चिनारी बनेको उल्लेख गरे ।
प्रदेश प्रमुख भट्टले भने – ‘विश्व संगीतको बजारमा प्रभाव पार्ने संगीत हामीसँग छ । संगीतकर्मीहरुले नेपाली मौलिक संगीतप्रति मोह बढाउने काम गर्न आवश्यक छ । मौलिकता रहने गरी संगीतलाई समयसापेक्ष विकास गर्नुपर्दछ।’
