वैकल्पिक अभियानमा होमिएका युवाहरूको रोजाई राष्ट्रिय स्वतन्त्र पार्टी (रास्वपा) बनेको छ ।
विवेकशील साझा पार्टीका संस्थापक नेतृत्व अहिले धमाधम रास्वपा प्रवेश गर्न थालेका छन् । पोखरा महानगरदेखि गण्डकी प्रदेश कमिटिसम्मका संस्थापकहरु रास्वपामा भित्रिएका हुन् ।
विवेकशील साझा पार्टी, गण्डकी प्रदेशका संस्थापक संयोजक महेश भण्डारीले माघ १५ गते रास्वपाको सदस्यता लिएको सार्वजनिक गरेसँगै वैकल्पिक अभियानमा होमिएका अन्य नेताहरु पनि खुलिरहेका छन् ।
विवेकशील साझा पार्टीका पूर्व कास्की संयोजक फडिन्द्र अधिकारी पनि रास्वपा पुगेका छन् । रविन्द्र मिश्र विवेकशील छाडेर राप्रपामा मिसिँदा कास्कीमा पनि मिश्र लाइनबाट जिल्ला उपाध्यक्ष भएका अधिकारी अहिले राप्रपाबाट रास्वपा बनेका हुन् । अवको वैकल्पिक शक्ति रास्वपा बाहेक अरू नभएको ठहर गर्दै अधिकारीले स्वतन्त्र पार्टी रोजेका हुन् ।
विवेकशील साझाका पोखरा महानगर कमिटि संयोजक मनकाजी गुरुङ पनि रास्वपा सदस्य बनेका छन् । दुवै जना शिक्षाकर्मी हुन् । फडिन्द्र पोखरा आदर्श माविका प्राचार्य र मनकाजी कान्तिपुर एकेडेमीका संस्थापक प्राचार्य हुन् ।
वातावरणविद् डा. कृष्ण पोखरेल पनि रास्वपा भित्रिएका छन् । यस्तै, व्यवसायी तथा अभियन्ताद्वय दीपक पौडेल र सोमनाथ ढुंगानाले पनि रास्वपा रोजेका छन् । पौडेल विवेकशील साझाका तत्कालिन केन्द्रीय सदस्य र ढुंगाना जिल्ला सदस्य थिए । डा. पोखरेल पनि जिल्ला सदस्य थिए ।
रास्वपाका गण्डकी संगठन विभाग सचिव एकराज न्यौपानेका अनुसार पोखरामा परिचित व्यक्तित्व, शैक्षिक क्षेत्रका अगुवा पार्टी प्रवेश गरेसँगै रास्वपाका केन्द्रीय तहका नेताहरू प्रसन्न छन् ।
रास्वपाका गण्डकी संगठन विभाग सचिव न्यौपाने पार्टीमा साथीहरू जोड्ने अभियानमा लागिरहेका छन् । तत्कालिन साझा पार्टी र विवेकशील नेपाली दलबीच एकता भई विवेकशील साझा बन्दा न्यौपाने संस्थापक जिल्ला संयोजक हुन् । उनी गत उपनिर्वाचनदेखि रास्वपामा आबद्ध भएका हुन् ।
गण्डकी संस्थापक संयोजक महेश भण्डारी रास्वपा भित्रिएसँगै वैकल्पिक अभियानका नेताहरु रास्वपा प्रवेश गर्न सहज मानेका छन् । अन्य युवा नेताहरू पनि रास्वपाको सदस्यता लिने मनसायमा पुगेका छन् ।
पार्टी वृहत्तर बनाउन लागिरहेका गण्डकी संगठन सचिव न्यौपानेका अनुसार कास्कीमा मात्रै ४ हजार पार्टी सदस्य पुगिसकेका छन् । गण्डकीमा २० हजार सदस्य बनिसकेका छन् । २०८१ वैशाख १ अघि कास्कीमा ५ हजार, गण्डकीमा ३० हजार सदस्य पुर्याउने लक्ष्यका साथ पार्टी अघि बढेको उनले बताए ।
‘नयाँ युवा साथीहरू मात्र नभई पूराना पार्टीबाट आजित बनेका नेता, कार्यकर्ताहरू पनि अब रास्वपाको विकल्प छैन भन्नेमा पुग्नुभएको छ । धेरै जना पार्टी प्रवेश गर्दै हुनुहुन्छ ।’ न्यौपानेले भने ।
वैकल्पिक अभियानकर्मी धमाधम पुनः एकीकृत हुँदै एउटै मार्गमा अघि बढ्ने निर्णयले आफूलाई उत्साहित बनाएको रास्वपा नवप्रवेशी महेश भण्डारी बताउँछन् ।
विवेकशील साझामा प्रदेश संयोजक बनेर नेतृत्व गरिसकेका भण्डारी अहिले विना पद रास्वपामा साधारण सदस्यको हैसियतमा भित्रिएका हुन् । उनले पद जनताको ईच्छा र पार्टीको आवश्यकताका आधारमा प्राप्त हुने चीज रहेको बताएका छन् ।
‘वैकल्पिक शक्तिको आवश्यकता रहेका बेला आ–आफ्ना व्यवसायलाई थाती राखेर देश बनाउने अभियानको नेतृत्व लियौँ । अगुवाले नै अभियान तहसनहस पारेपछि बीचमै रोकियौँ, छोडियौँ, मोडियौँ । अब पुनः एकसाथ अघि बढ्ने स्थिति बनेको छ । हिजोका सबै मित्रहरु छरिएका छन् । अब जोडिँदैछौँ । सँगाल्दै, सम्हाल्दै सँगसँगै अघि बढ्ने हो ।’ – भण्डारीले भने ।
सम्बन्धित समाचारः
