राजनीतिबाट केही समय विश्राम लिएका युवा नेता महेश भण्डारी राष्ट्रिय स्वतन्त्र पार्टी (रास्वपा) प्रवेश गरेका छन् ।
पोखराका परिचित सञ्चारकर्मी/सञ्चार उद्यमी भण्डारीले ५ बर्षअघि तत्कालिन वैकल्पिक पार्टीका रूपमा उदाएको विवेकशील साझा पार्टीबाट राजनीति सुरू गरेका थिए ।
२०७५ कार्तिक १० गते पोखरामा भव्य कार्यक्रम गरी उज्ज्वल थापा र रविन्द्र मिश्रले माटोको टीका लगाएर भण्डारीलाई पार्टीको गण्डकी प्रदेश संयाेजकको जिम्मेवारी दिएका थिए ।
२०७८ कार्तिक ११ गते मिश्रले मार्ग परिवर्तन भन्दै राप्रपाको लाइनमा पार्टी लगेपछि भण्डारी बाहिरिए । त्यसयता स्वतन्त्र अभिव्यक्ति दिँदै आएका भण्डारी रास्वपा गठनपछि पार्टीका नेताकार्यकर्तासँग निकट रहे । आज औपचारिक रूपमै उनले पार्टी प्रवेश गरेको सदस्यतापत्र सार्वजनिक गर्दै सामाजिक सञ्जालमार्फत् जानकारी गराएका हुन् ।
रास्वपामा कुन भूमिकामा रहने भन्नेबारे उनले केही खुलाएका छैनन् । भण्डारीले भनेका छन् – ‘मैले हिजो राजनीतिमा रहँदा कुनै पद वा जिम्मेवारी वा लोभ राखिनँ। आज पनि पहिलेको जस्तै कुनै दुर्भावना नराखी सप्रेम, सगौरव राष्ट्रिय स्वतन्त्र पार्टीको सदस्यता लिने निर्णयमा पुगेँ।’ भण्डारीले वैकल्पिक अभियानमा जोडिएको बताउँदै आफ्नो लागि पद गौण रहेको बताए ।
दुई दशकदेखि सञ्चारकर्ममा क्रियाशील छन् भण्डारी । पोखरा १४ चाउथेका स्थायी बासिन्दा भण्डारी यहाँको बिग एफएम १०१.२ मेगाहर्ज र बिग खबर डटकमका सञ्चालक हुन् ।
भण्डारीले फेसबुकमा लेखेका छन् :
र पुन: समाहित भएँ वैकल्पिक अभियानमा
०००
दुई दशकदेखि सञ्चारकर्ममा क्रियाशील थिएँ। लेखन कर्ममा पनि निरन्तर लागेँ। विभिन्न फरक धार र धरातलका इभेन्टहरूको आयोजना र व्यवस्थापनमा उत्तिकै खटिएँ। पाँच वर्षअघि यी सबै काम र क्रियाशीलतालाई थाती राख्दै एक वैकल्पिक राजनीतिक दलको जिम्मेवार पदमा रहेर क्रियाशील रहेँ।
त्यसबेला गण्डकी प्रदेशका सबै जिल्ला, गाउँ र नगरहरूमा दलको संगठन निर्माण गर्दै उत्साह र हौसलाका साथ अगाडि बढ्दै थिएँ। अचानक मोड यस्तो आयो कि; दलका अगुवाले नै मार्ग-परिवर्तन गरे। हामी अधिकांशले देखेको सपनासँग त्यो मार्गको कुनै साइनो थिएन। केही साथीहरू झुक्किए, केही झोक्किए। अन्ततः दल क्षतविक्षत भयो। मजस्तै कैयन् युवा नेताहरू निस्क्रिय र निस्काम बने। अझ पोखरामा रहेर वैकल्पिक राजनीतिको जग र जमिन जोगाउन र पुनर्निर्माण गर्न मुस्किल भयो।
भनिन्छ, जे हुन्छ राम्रोको लागि हुन्छ।
वैकल्पिक अभियान अघि बढाउँदै केही साथीहरूले गजबको आँट गरे र राष्ट्रिय स्वतन्त्र पार्टीको स्थापना गरे। अहिले जनताले आशा गरेका छन्, विश्वास गरेका छन्। केन्द्रदेखि वडासम्म यस पार्टीमा हिजो वैकल्पिक राजनीतिक अभियानमा सँगसँगै लागेका थुप्रै साथीहरू आवद्ध भएका छन्। र, म स्वयम् उक्त पार्टीको स्थापना, चुनावी तयारी र विचार निर्माण लगायतका चरणहरूमा नजिक थिएँ, छु । यो निकटता भावानात्मक थियो। खास राजनीति, अझ भनौँ जनताको लागि गरिने राजनीति भावानात्मक मात्रै हुँदैन, प्रत्यक्ष हुन्छ। हस्तक्षेपकारी हुन्छ। साथीभाइ र शुभेच्छुकहरूसँग कैयौँपटक बसेँ । छलफल भयो।
मसँग अब मात्रै दुईवटा विकल्प थिए।
पहिलो थियो– चुपचाप पुरानै काम वा पेसामा फर्कने। र दोश्रो– विचार मिल्ने अधिकांश पुराना साथी र असंख्य नयाँ साथीहरूले अकल्पनीय आँट गरेर सुरु गरेको पार्टीमा क्रियाशील हुने। नयाँ साथीहरुबाट नयाँ कुरा सिक्ने।
मैले दोश्रो विकल्प रोजेँ।
मैले हिजो राजनीतिमा रहँदा कुनै पद वा जिम्मेवारी वा लोभ राखिनँ। आज पनि पहिलेको जस्तै कुनै दुर्भावना नराखी सप्रेम, सगौरव राष्ट्रिय स्वतन्त्र पार्टीको सदस्यता लिने निर्णयमा पुगेँ।
बाँकी कुरा जनताको चाहना, पार्टीको आवश्यकता र शुभेच्छुकहरूको हो। जो आज्ञा !
महेश भण्डारी
पोखरा- १४, कास्की, गण्डकी।
