पोखरा । घाँस काट्ने क्रममा लडेका चर्चित अभिनेता प्रकाश घिमिरेको स्वास्थ्यअवस्थामा राम्रो सुधार भइरहेको छ । शरीरका घाउ चोटहरु बिसेक हुँदैछन् । भित्री दुखाई कम महसुस हुँदै गरेको घिमिरे बताउँछन् ।
मंगलबारसम्म आइपुग्दा उनको ज्यान मात्र मणिपाल हस्पिटलको बेडमा छ । मन भने फिल्म सेटमै छ । बेड छाडेर सेटमा पुग्ने हुटहुटी छ । भेट्न पुग्ने शुभेच्छुकसँग मज्जाले गफिन्छन् । फिल्म हलमा चलिरहेको आफू अभिनित फिल्मबारे सोधीखोजी गर्छन् । सुटिङ रोकिएका फिल्मबारे चिन्ता मान्छन् । रसिक स्वभावका उनले उस्तै पारामा दोहोरो कुराकानी गर्छन् । तर, अझै केही दिन कम भेटघाट गर्न चिकित्सकले सुझाएका छन् ।
अभिनेता घिमिरेलाई आइसियूबाट आइतबार वार्डमा सारिसकिएको छ । त्यहाँ नै उनको दैनिक फिजियोथेरापी चलिरहेको छ । घिमिरेको स्वास्थ्यलाभमा चिकित्सक छोरी र आफन्तको पनि महत्वपूर्ण भूमिका छ । छोरीले चिकित्सकीय सेवादेखि थेरापीसम्ममा साथ दिइरहेकी छिन् ।परिवारले अबको केहि दिनमा डिस्चार्ज हुने जनाएका छन् ।
हामीसँगको कुराकानीमा घिमिरेले फिल्म हलमा चलिरहेको भष्मे डन, सुटिङ जारी रहेको डिग्री माईला, सुटिङ सुरु हुन लागेको महाजात्रा आदि चलचित्रबारे चिन्ता व्यक्त गरे । महाजात्राको निर्माणपक्षसँग फोनमै कुराकानी पनि गरे । आफ्नो स्वास्थ्यसुधारको लागि बौद्धविधि अनुसार पूजापाठ गरेकोमा कार्यकारी निर्माता एवं अभिनेता रबिन्द्रसिंह बानियाँलाई आभार व्यक्त गरे ।
लडेपछि अचेत उनको अस्पतालको बेडमै होस फर्कियो । आफ्नो लागि शुभेच्छा र प्रार्थना गर्नेहरु धेरै पाएकोमा प्रशन्नता व्यक्त गर्दै उनले भने – ‘माया गर्ने मान्छे धेरै कमाएछु । यही रहेछ कमाएको । खुशी लागेको छ ।’
घिमिरे दशैं चलिरहेका बेला गत कार्तिक १० गते शुक्रबार पोखरा नदिपुरको भिरमा गाईलाई घाँस काट्ने क्रममा लडेर गम्भिर घाइते भई अचेत भएका थिए । पहराबाट उनी करिब ५० मिटर तल झाडीमा खसेका थिए।
तत्काल पोखराको मणिपाल शिक्षण अस्पताल लगिएकोमा त्यहीँ निरन्तर उपचार भैरहेको छ । हेलिकोप्टरमार्फत् काठमाण्डौ लैजाने तयारी गरिरहँदा चिकित्सकले मणिपालमै उपचार हुने भनेपछि यहीँ उपचारलाई निरन्तरता दिइएको थियो ।
उनको स्वास्थ्यमा क्रमिक रुपमा राम्रो सुधार हुँदै गएको उपचारमा संलग्न चिकित्सकले बताएका छन् । अहिले फिजियोथेरापीको काम भइरहेको छ । प्रकाशको टाउकोमा चोट लागेको छ। छातीको करङ भाँचिएर फोक्सोमा छोएको थियो । ढाडमा पनि चोट लागेको थियो । अहिले ठीक हुँदैछ ।
नाटकबाट अभिनय यात्रा थालेका प्रकाशले हालसम्म तीन दर्जनभन्दा बढी नाटकमा अभिनय गरिसकेका छन्। उनले २०६१/६२ सालतिर निर्देशक नबिन सुब्बाद्वारा निर्देशित नेपाल टेलिभिजनमा प्रसारित नेपाली धारावाहिक टेलिसिरियल ‘दलन’मा अभिनय पनि गरे । यो उनको चलचित्र क्षेत्रमा पहिलो डेब्यू थियो ।
विस्तारै उनी अभिनय यात्रा सिने क्षेत्रमा छलाङ्ग मार्दै गयो । उनीद्वारा अभिनित नेपाली चलचित्रहरु ‘टलक जंग भर्सेस टुल्के, जात्रा, जात्रै जात्रा, पशुपति प्रसाद, छ माया छपक्कै, साईंली, फन्को, पञ्चे बाजा, घाम पानी, पानीफोटो आदि छन् । प्रकाश अभिनीत चलचित्र ’पशुपति प्रसाद २ः भष्मे डन’ अहिले प्रदर्शनमा छ।
नदिपुरकै कन्या माविमा ३७ वर्ष शिक्षण गरेका प्रकाश २०७५ सालमा अवकाश लिएपछि अभिनय क्षेत्रमा क्रियाशील भएका हुन्।
