पोखराको बाग्लुङ बसपार्क क्षेत्र नै बदनाम गर्ने गरी दशक अघि यौनधन्दा सञ्चालित थियो । तत्कालिन एसपी बसन्तकुमार लामाले यस विरुद्ध कडा अपरेशन चलाएपछि त्यहाँबाट तितरबितर भएका यौन व्यवसायी टोलटोलमा छरिए । कतिपय भित्री टोलमा रेष्टुरेन्ट एण्ड बारको नाममा यौन धन्दा व्यवसाय चलि नै रहेको गुनासो स्थानियले गरेका छन् । फोन फोनबाट मोलमोलाई गरी ट्याक्सी चालकले ग्राहकसम्म यौनव्यवसायी लग्ने गरेको घटना पनि नौलो रहेन । पछिल्लाे समय भने डिजिटल माध्यमको प्रयोग गरी यौन व्यवसाय सञ्चालन गर्ने गरेकाे पाइएकाे छ । यसमा संलग्न समूहहरु एकपछि अर्को गरी पक्राउ परेका छन् ।
कास्की प्रहरीले एक साता अघि (१४ फागुनमा) यौन धन्दा चलाउने गिरोहका दुई सदस्य पक्रियो । भोलिपल्टै यो गिरोहका नाइके पक्राउ परे । नाइके पोखरा ७ मुस्ताङचोकका ३० वर्षीय नारायण पोखरेल हुन् । उनकी प्रेमिका सिन्धुपाल्चोकको चौतारा नगरपालिका, ६ ठूलीधाराकी २२ वर्षकी पूजा थापा मगर र बाँके चिसापानी ९ का २२ वर्षीय विशाल योगी हुन् । यो समूह विरुद्ध मानव बेचबखन तथा ओसारपोसार मुद्धा अघि बढेको छ । यसअघि दुई समूह समातिसकिएको कास्की प्रहरीले बताएको छ ।
यौन व्यवसायमै संलग्न रहेकी किशोरीले प्रहरी गुहारेपछि यिनीहरु समातिएका हुन् । ती किशाोरीले प्रहरीलाई १४ फागुनको मध्यरात १२ बजे फोन गरेर आफू पीडित भएको भन्दै गुहार मागेकी थिइन् । जानकारी पाएलगत्तै कास्की प्रहरीका इन्स्पेक्टर मुकेश न्यौपानेको नेतृत्वमा चार जनाको टोली खटिएको थियो । त्यही रात लेकसाइडको जरेवरबाट पूजा र विशाललाई नियन्त्रणमा लिइएको कास्की प्रहरी प्रवक्ता डिएसपी सुन्दर तिवारीले बताए ।
मुख्य योजनाकार एवं यो समूहका नाईके नारायण पोखरेललाई प्रहरीले १५ फागुनमा घेरा नै हालेर रामबजारबाट समातेको हो । अघिल्लो रात डेरामा नभेटिएका उनी भोलिपल्ट पक्राउ परेका हुन् ।
कारमार्फत् घरमै युवती डेलिभरी
अनलाइन यौनधन्दा चलाउने मुख्य योजनाकार नारायण र पूजाको जोडी हो । उनीहरुले यस्तो व्यवसाय गर्नका लागि सामाजिक सञ्जाललाई मूख्य हतियार बनाएका छन् । विभिन्न फेक आइडी र आफ्नो पहिचान नखुल्ने मोबाइल नम्बरबाट भाइबर, ह्वाट्सएप जस्ता आइडी बनाउने र त्यसमार्फत् नै यौनसम्पर्क गर्न चाहनेका लागि विभिन्न सूचना जारी गर्ने गर्दथे । त्यसपछि ग्राहकले उनीहरूलाई सम्पर्क गर्दथे । उनीहरूले आफ्नो सम्पर्कमा भएका युवतीका तस्वीर ग्राहकलाई पठाउने र ग्राहकले रोजेका युवती छान्दथे ।
रेट मिलेपछि ठाउँ निश्चित गर्दथे । विशालले ‘होम डेलिभरी’को काम गर्ने गरेको प्रहरीको अनुसन्धानबाट खुलेको छ । प्रहरीका अनुसार विशालले कार प्रयोग गरेर युवतीलाई ग्राहकसम्म पु¥याउँथे । युवतीलाई ग्राहकसम्म लैजान प्रयोग गरिँदै आएको निलो रंगको ग२च ४८२४ नम्बरको कार पनि प्रहरीले नियन्त्रणमा लिएको छ ।
यो गिरोहले लेकसाइडमा कोठा भाडामा लिई यौन धन्दा चलाउने गरेको प्रहरीले जनाएको छ । विभिन्न होटेलमा माग अनुसार महिला उपलब्ध गराइदिने भन्दै उनीहरुले धन्दा चलाएको खुलेको हो । ‘यौन व्यवसाय गर्न बाध्य पार्ने अनि कोठा मिलाएर राख्ने गरेका रैछन्,’ प्रहरी निरीक्षक मुकेश न्याैपानेले भने ।
जति कम उमेर, त्यति महँगो मूल्य
प्रहरीका अनुसार उनीहरूले उमेर समूह हेरेर युवतीहरूको मूल्य तोक्थे । १८ वर्षभन्दा मुनिको माथिको फरक–फरक रेट तोकिने गरेको जाहेरीवालाले प्रहरीलाई बताएका छन् । १८ वर्षभन्दा मुनिका युवतीको १७ हजार रुपैयाँ प्रतिरात र त्योभन्दामाथि उमेर समूहका युवतीको १५ हजार रुपैयाँ प्रतिरातसम्म ग्राहकबाट लिने गरेको पाइएको छ । अर्थात् जति कम उमेर, त्यति महँगो मूल्य ।
यसरी महँगो मूल्यमा युवतीको माग गर्नेहरू प्रायः छोटो समयका लागि पोखरा आउने पर्यटकहरू रहेको प्रहरी स्रोत बताउँछ । ‘अधिकांश पोखरा घुम्न आएकाहरू नै ग्राहक हुँदा रहेछन् । पोखराका नियमित ग्राहक पनि हुने रहेछन्,’ प्रहरी निरीक्षक न्याैपाने भन्छन्, ‘जाहेरी दिनेहरू सात महिना, तीन महिना र एक महिनादेखि यो समूहसँग जोडिएको पाइएको छ ।’
लेनदेन नमिल्दा प्रहरीलाई गुहार
प्रहरीको सम्पर्कमा आएका युवतीहरु सुरुमा सहमतिमै देहव्यापारमा लागेका हुन् । पछि उनीहरुनै प्रहरीको सम्पर्कमा आउनु भने आश्चर्यको विषय बनेको छ । यस्ता घटना लेनदेन नमिल्दा सार्वजनिक हुने गरेका छन् ।
यो घटना सार्वजनिक हुनुको एउटा कारण आर्थिक पाटो पनि हो । ग्राहक खोज्नेले मोटो रकम असुल्ने र युवतीले कम रकम पाउँदा मनमुटाव भएको प्रहरीको अनुमान छ ।
महिनामै लाखौं कमाईको आशमा देहव्यापार
अहिलेसम्म देहव्यापारमा संलगन तीन जना युवती प्रहरीको सम्पर्कमा आएका छन् । यसमा संलग्न अधिकांश महिला दुर्गम क्षेत्रबाट आएको देखिएको छ । यौन व्यवसायमा लागेकाहरू सामान्य लेखपढ गरेका र स्याङ्जा, सिन्धुपाल्चोक, पर्वत, म्याग्दी, बाग्लुङ लगायत जिल्लाका ग्रामीण भेगबाट पोखरा आएका हुन् । कसरी पोखरा ल्याइन्थ्यो भन्नेबारे प्रहरी अनुसन्धानरत छ ।
केही युवतीको बयान अनुसार उनीहरुलाई प्रलोभन, धम्की र यातना दिएर यौन व्यवसायमा लगाउने गरेको खुलेको छ । केही युवती देहव्यापारमा लागेको एक वर्ष पनि पुगेको छैन । होटलमा काम लगाइदिने भन्दै ल्याए पनि विस्तारै यौन व्यवसायमा संलग्न गराएको र अहिले बारम्बार यातना दिएको उनीहरुको दाबी छ ।
महिनामा लाखौं कमाएर पोखरामै स्थापित हुन सकिने प्रलोभन दिई यौन धन्दामा लगाइएको प्रहरी अनुसन्धानमा खुलेको छ । सुरुवाती दिनमा राम्रो आम्दानी भए पनि पछिल्ला दिनमा विस्तारै ब्ल्याकमेलिङ गर्दै मानसिक यातना दिने, ग्राहकसँगको सम्बन्धपछि पैसा नदिने, यौन व्यवसायमा संलग्न छ भन्दै परिवारलाई सुनाइदिने, समाजमा बदनाम गरिदिने धक्की दिने गरेपछि प्रहरीकहाँ उजुरी गर्न आइपुगेको उनीहरुले बताएका छन् ।
‘ग्राहकसँग धेरै पैसा उठाउने यौन व्यवसायमा संलग्नलाई सुरुमा ४/५ हजार दिने, पछि पैसा नै नदिने र मानसिक यातना दिने गरेको खुलेको छ ।’ प्रहरी निरीक्षक न्याैपाने बताउँछन् ।
गिरोहका नाइकेका चार डेरा
यो घटनाका नाइके नारायण पोखरेललाई देखेर प्रहरी नै चकित परेको छ । अनुसन्धान गर्दै जाँदा प्रहरीले पोखरामा उनको चार वटा डेरा भेटेको छ । पोखरा १७, रातोपहिरामा उनी बस्छन् । छिमेकी वडा पोखरा, ७ मा उनको अर्को डेरा छ । त्यहाँ श्रीमती बस्छिन् । प्रेमिका पूजालाई लेकसाइडको स्ट्रीट नम्बर ३ मा डेरामा राखेका छन् भने आमाबुवालाई नजिकै स्ट्रीट नम्बर ७ मा राखेका छन् ।
‘ऊ एकदमै चलाख रहेछ । चार जना चारतिर राखेको छ । त्यस्तो हुँदा कसैले शंका नै गर्न सक्दैन,’ प्रहरी निरीक्षक न्याैपाने बताउँछन् । पोखरेलसहित पक्राउ परेका तीनै जनालाई बिहीबार आठ दिनको म्याद थपेर प्रहरीले अनुसन्धान गरिरहेको छ । मानवबेचविखन तथा ओसारपोसार मुद्दामा कास्की जिल्ला अदालतबाट बिहीबार म्याद थप गरिएको हो ।
उनीहरूकै सहयोगमा प्रहरीले यस्तै क्रियाकलापमा संलग्नको खोजी गरिरहेको छ । प्रहरीले पक्राउ परेका र पीडितबाट अरु गिरोहको पनि सुइँको पाएको छ । प्रहरी निरीक्षक न्याैपानेले भने, ‘यो घटनाको अनुसन्धान गर्दा अरु पनि संलग्न रहेको सूचना पाएका छौँ । भनेजस्तो भए अरु पनि समातिन सक्छन् ।’
