पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) को परिसरमा रहेको पूरानो गाडीमा सालनालसहितको शिशु फेला परेको छ । मंगलबार बिहान साढे नौ बजेतिरको समयमा अस्पताल पुगेका एक युवकले बच्चा फेला पारेका हुन् ।
बच्चालाई जन्माउने बित्तिकै बसमै छाडेकी महिला फरार छिन् । तत्काल उपचार गरेपछि बच्चाले जीवनदान पाएका छन् । अस्पतालकी कर्मचारी विष्णु तामाङले आफू स्कुटरमा जाँदै गर्दा बच्चा फेला परेको र देख्ने युवककाे सहयाेगमा तत्काल अस्पताल लगेकाे सञ्चारकर्मीसँग बताईन् ।
‘म स्कुटरमा गइरहँदा एउटा भाइले बच्चा-बच्चा भनेर चिच्यायो । झाडीमा कुकुरको बच्चा जस्तो लागेको थियो तर मान्छेकै बच्चा रहेछ ।’ तामाङले भनिन् – ‘बसकाे सीट बीचकाे भुइँमा बच्चा थियाे । बच्चाले आवाज निकालिरहेकाे भएपनि मुखबाट फिँज आइरहेको थियो । भाइले एकजना दिदीसँग लुङ्गी मागेर ल्याउनुभयो । मैले बच्चा बोकेँ र भाइले बसभित्रकै थोत्रो प्लाष्टिकमा सालनाल पोको पारेर बोक्यो । ’
अस्पतालको एनआईसियू वार्डमा नर्सिङ ईञ्चार्जका रुपमा कार्यरत सावित्री न्यौपानेले अहिले बच्चाको अवस्थामा सुधार भइरहेको जानकारी दिइन् । उनले भनिन् – ‘छोरो हो । साढे ३ किलोको राम्रो अवस्थामै जन्माएको रहेछ । तर, त्यस्तो ठाउँमा छोडिदिँदा यस्तो बिजोक भयो । बच्चाको शरीरभरी माटो थियो । अस्पतालमा ल्याउँदा त एकदम गम्भिर थियाे । चिसो थियाे । शरीर पनि निलो भइसकेको थियो । श्वास फेर्न नै कठिन अवस्थामा थियो ।’
बच्चालाई तत्काल तातो बनाएर श्वास फेर्न सहज बनाउने मेसिन जडान गरेको बताउँदै उनले बच्चालाई उपचार सुरू गरेपछि प्रहरीलाई खबर गरेको बताइन् । ‘बच्चामा पूर्ण सुधार अझै आइसकेको छैन । अहिले उपचार भइरहेको छ । बेवारिसे बच्चाहरु भेटिएमा त्यसको रेखदेख गर्ने एकद्वार संकट व्यवस्थापन प्रणाली ‘ओसिएमसी’ भन्ने संस्था छ । अब त्यो संस्थाकै रेखदेखमा बच्चाकाे उपचार अघि बढ्छ।’ न्यौपानेले भनिन् । बच्चालाई अस्पताल लग्ने विष्णु साँझतिर हेर्न पनि गईन् । भेन्टिलेटरमा भएकाले भेट्न पाइनन् ।
यसैबीच, जिल्ला प्रहरी कार्यालय, कास्कीका प्रमुख एसपी रमेश थापाले अहिलेसम्म बच्चा फालेर हिँड्ने महिलाबारे थाहा हुन नसकेको बताए । उनले महिलाको खोजी कार्य भइरहेको जानकारी दिँदै बच्चा संरक्षणको कानुनी प्रक्रिया पनि अघि बढाइएको गण्डकन्यूजलाई बताए ।
अहिले सामाजिक सञ्जाल टिकटकमा युवक र युवतीले बच्चा बोकेर अस्पताल लगिरहेको २ वटा भिडियो भाइरल बनेको छ ।
